IslamoPhobia- kahadlok nga way pasikaranan

Unsa ang Islam?

Ang Islam gikan sa arabong pinulongan ‘silm’ nga nagkahulugan ‘kalinaw’ sa iyang pinakamabaw nga pagpasabot. Mao usab kana ang ginapaabot sa mga Muslim sa ilang panagbinatiay sa usag-usa, sa dihang maga-ingon sila ug ‘As-salamu alaykum’ ang buot niining ipasabot mao ‘Ang kalinaw (salam o Islam) maanaa kaninyo’. Sa ato pa, ang buot diay ipasabot sa Islam ug ang pinaka tumong nga katudluan niini mao ang pagpakuyanap sa kalinaw. Ang kahulugan sa Islam sa relihiyoso nga panglantaw mao ang ‘Kumpleto nga pag sunod sa kagustuhan sa Dios nga mao ang labaw nga makagagahum’. Kun atong palandungan, ang kumpleto nga pagsunod sa kagustuhan sa labawng makagagahum mao lamang ang bugtong hinungdan kun unsaon nato pagkabaton sa tinuod nga kalinaw. Kalinaw sa atong kaugalingon, kalinaw sa katilingban ug kalinaw sa tanang mga binuhat.

Sa laing bahin, ang buot ipasabot sa pulong Muslim mao ang ‘bisan kinsa nga binuhat nga misunod ug mipailalom sa kagustuhan sa Diyos’. Sa ato pa, ang tanan nga mga binuhat nga mipailalom sa kagustuhan sa Dios Muslim diay. Ang adlaw nga nagsunod lamang sa mando kaniya, ang bulan o bisan pa ang tibuok kalangitan ug ang mga mananap sa kayutaan tungod kay sila wala misupak sa kagustuhan sa Dios ug sila misunod sa tanang balaud nga gimando sa Dios kanila, sila usab matawag nga Muslim.

Ang tawo gi awhag sa pagpailawom

Ang tawo gitagaan sa iyang kagawasan, naa ra kaniya kun unsa nga dalan iyang pilion- kung musunod ba siya sa kagustuhan sa Dios (mag muslim siya) o mosupak niini. Sa Pulong sa Dios nga mao ang balaan nga Qur’an nahisulat kini:

Balad 90:8-11- “Dili ba gihimo namo alang kaniya ang pares nga mata? ug ang dila, ug ang pares nga simod? Ug gitudlo kaniya ang duha ka alagianan?”

Ug tungod kay naa may kagawasan ang tawo o ginatawag kini nga free will, siya gina-imbitahan nga mopailalom sa iyang kaugalingon ug mo-surender sa Dios nga labaw nga makagagahum, sa laktod nga pagka-sulti, siya mag Muslim kay mao kini ang tumong nganong gihimo kita sa Dios, nga kita motahod kaniya ug mosimba kaniya lamang pinaagi sa pag sunod sa iyang kabubut-on.

Aron masabtan nato kini pag-ayo atong balikan ang kaagi ni Propeta Adan. Sa unsang hinungdan nga sila gipakanaug sa paraiso? Tungod kay sila misupak sa kagustuhan sa Dios, sa iyang mando kanila nga dili sila moduol sa usa ka kahoy aron dili sila makaka-on sa ginadili nga bunga niini. Sa laktod nga pagkasulti, ang gusto diay sa Dios nga kita motuman kaniya ug magpailalom sa iyang kagustuhan ug mao kini ang buot ipasabot sa pulong Muslim sa ato nang gikaingon.

Ug kun atong sundun kining maong kahulugan sa Islam ug Muslim, ato usab nga mahibaloan nga si Jesu-Kristo diay usa ka Muslim kay siya usa ka tawo nga mi surrender sa iyang kabubut-on ngadto sa kabubut-on sa Dios.

Lukas 22:42- “Amahan, kun mahimo kuhaa kanako kining maong kopa, apan dili ang akong kabubut-on kundili ang imo maoy matuman.”

Gihimo lamang aron motuman

Ang tanan nga mga binuhat gihimo sa Dios aron lamang motuman sa iyang gusto o mo-surrender kaniya, ug bisan kinsa nga binuhat nga mosupak niini nagahimo lamang ug lihok nga makadaut sa iyang kaugalingon.
Sama sa usa ka isda, ang tanang bahin sa iyang lawas gihimo aron mopuyo siya sa tubig. Gibuhatan siya ug tiyan (lungs) aron nga mamahimong sayon alang kaniya ang pag ginhawa sa tubig. Mao usab ang iyang bukog aron mamahimong sayon kaniya ang pag langoy sa tubig. Ingon usab sa langgam nga gihimuan ug pako aron dali alang kaniya nga molupad sa kahanginan ug bisan ang liso gihimo sa Dios aron gyud kini ilubong sa yuta. Kung ang isda mosupak sa kagustuhan sa Dios nga siya gihimo aron lamang mopuyo sa tubig ug dili siya makuntento ug supakon niya kining maong balaud nga maoy tumong nganong siya gihimo, kun mulukso siya sa tubig siya mamatay. Mao man usab ang langgam nga gihimo aron sa paglupad sa kahanginan o kaha ang liso nga alang gyud ilubong sa yuta. Kun dili nila tumanon kining maong kagustuhan ug balaud sa Dios, kun ang langgam maglakaw nalang sa yuta delikado siya ug sayon ra siyang dakpon sa mananap nga gutom ug naglaway kaniya. Kun ang liso wala matanom sa lawom nga yuta mamatay kini ug kun motubo man dali ra siyang bali-on ug patumbahon bisan sa hinay kayo nga hangin.

Kini tinuod usab diha sa tawo, kita gihimo sa Dios aron motuman ug mosunod sa iyang kabubut-on, mao kana ang kahulugan sa usa ka Muslim. Kinsa man ang mosupak niini ug maghimo siya ug iyang balaud, sama ni Adan nga nasayop kaniadto siya pagasilotan. Apan mayo nalang si Propeta Adan kay siya naghinulsol man ug mi-surrender sa kagustuhan sa Dios.

Pakigdait ug dili pagpatay

Kun atong nasabtan ang mga pakahulugan sa ibabaw atong masabtan nga ang Islam diay nagatudlo sa tawo nga siya mahimong Diosnon pinaagi sa pagsunod sa tanan nga gisugo kaniya sa Dios. Ang Islam wala magtudlo ug kagubot kondili pakigdait ug kalinaw.

Pangutana: Apan ngano man nga daghan man nga mga nahitabong kagubot o patay sa ngalan sa Islam kun nagtudlo pa kini ug kalinaw?

Tubag: Kini nga mga buhat wala gitudlo sa Islam apan resulta lamang kini sa pagsupak sa mga tawo sa kasuguan sa Dios. Ang Muslim usa ka tawo nga pwede usab nga masayop ug makasala busa gani anaa ang Sharia o ang balaud sa Islam tungod kay dili man tanan Muslim perpekto ug bisan pa ang matag usa kanato Muslim man o dili. Dili buot ipasabot nga tungod kay Muslim siya masunod na niya ang tanan nga gisugo sa Islam ug masabtan niya kini.
Ang gihimo nga kadautan sa usa ka tawo iyang pagabayran sa adlaw sa paghukom bisan unsa pa niini ka gamay. Ug bahin sa pagpatay ang pulong sa Dios nga mao ang balaan nga Qur’an nagsaysay:

Maida 5:32- “…that if any one slew a person – unless it be for murder or for spreading mischief in the land – it would be as if he slew the whole people: and if any one saved a life, it would be as if he saved the life of the whole people. “

Miingon usab si Allah sa lain pang bahin sa iyang pulong:

Maidah 5:82- “… and nearest among them in love to the believers (Muslims) wilt thou find those who say, “We are Christians”: because amongst these are men devoted to learning and men who have renounced the world, and they are not arrogant.

Dinhi niining maong mga kinutlo atong masabtan nga ang pagpatay usa ka dakong sala nga angayan lamang gyud silotan. Ug ato usab nga masabtan nga ang mga Kristiyano gi dayeg sa Dios mismo sa iyang balaan nga pulong isip mga tawo nga angayan nga mahimong duol sa kasing-kasing sa mga Muslim tungod kay sila dili mga mapahitas-on. Kun mao wala diay magtudlo ang Islam nga kita mag pinatyana bisan man gani ang pagdumot apan naga sugo kini nga kita magminahalay.

Ayaw paghukom

Daghan karon nga ang pagtoo nila sa Islam dautan ug nagatudlo kini sa kagubot o kaha sa mga butang dili maayo busa kung sila makakita ug mga Muslim lain ang ilang pagtoo ug pag tan-aw kaniya. Sa ako nang gika-ingon nga ang tawo nga Muslim masayop gayud ug dili tungod kay Muslim kana maperpekto na nimo ang tanan nga gisugo sa Islam ug dili kana masayop ug tungod kay aduna usa’y mga Muslim nga nadala sa ilang tawhanong emosyon ug natintal sa mga butang kalihokan nga gibawal sa Islam, ang relihiyong Islam na hinuon ang nabulingan.

Sa mga dili Muslim kami nagapanawagan nga kun ang usa ka Muslim nakahimo ug dili maayo ayaw lang ninyo e-generalize tanan ug ayaw ipasangil sa Islam ang gihimo sa Muslim kay dili tungod ila kining gihimo gi-uyonan na kini sa Islam. Mao kana ang tinuod nga hustisya nga ang gibuhat sa usa ka tawo iya lamang ug bisan sa Bibliya nahisulat kana

Ezekiel 18:20- “Ang kalag nga nakasala siya mamatay. Ang anak dili pagabasulon sa sala sa amahan ni ang amahan pagabasulon sa sala sa anak. Ang pagkamatarung sa tawong matarung kaniya lamang ug ang pagka dautan sa tawong dautan kaniya lamang. Ang kada usa kanato mamatay sa atong kaugalingong kasal-anan.”

Ang usa ka Muslim kun makahimo ug dautan sa panan-aw sa uban dautan gyud ang Islam pero kining maong pagtoo sayop ug bias. Sama sa grupo nga PNP o Philippine National Police sa atong nasud, nasayod kita nga kining grupoha sa kapulisan gitukod aron bantayan ang atong katilingban gikan sa mga samokan aron kita makabaton ug kahusay ug kalinaw sa atong katilingban. Apan bisan pa niana daghan usab atong gakasaksihan nga mga membro sa PNP nga nakahimo ug kalapasan sa balaud. Kung ang tulo ka membro sa PNP na sakpan nga naghimo ug kadautan, sama kunuhay sa pagpanulis o pagbaligya sa ginadili nga droga angayan ba natong isulti nga ang PNP dautan? Dili diba? Tungod kay ang pipila ka PNP dili igo aron maoy mo representa sa kinatibuk-an nga grupo. Mao usab kana nga mga pasikaranan ang atong gamiton sa Islam ayha kita maghukom nga kun nay Muslim nga nakahimo ug kadautan dili nato pwede e-generalize nga ang Islam dautan tungod kay wala kini magtudlo niana.

PANGUTANA: Kung wala magtudlo ang Islam niana nganong kasagaran sa mga Muslim mga dautan man?

TUBAG: Kun naa kay nakita nga pulis nga nag jay-walking ug kabalo kita nga nahisupak kini sa balaud, tungod kay gibuhat kini sa usa ka pulis ang buot ba niining ipasabot pwede na ang jay-walking? Mao usab kana nga kung adunay pipila ka mga Muslim nga nagbuhat ug dautan ang buot ba niining ipasabot gitudlo kini sa Islam? Wala! Busa dili nato pwede nga hukman ang relihiyon nga nagtudlo lamang kanato sa dalan padulong sa kaayuhan. Sama bas a usa ka bag-o nga sakyanan nga tungod sa kahubog sa drayber iya kining giagi sa basakan ug nagkabulingit, ato bang ingnon “nabuang ang sakyanan”? ang sakyanan ba ang angay basulon? Dili, apan ang drayber tungod kay naghimo siya ug kabuang sa iyang kaugalingon pinaagi ug pag drayb nga nakainom. Ang Islam nagatudlo kanato sa maayong agianan, nga atong ipanginabuhi sa maayong dalan ang atong kaugalingon ug kun adunay mga Muslim nga nagbuhat ug kadautan dili nato pwede nga ibasol kini sa Islam kundili sa tawo lamang.

Kabahin sa pag-ingon nga kasagaran sa mga Muslim dautan man, ang akong tubag ayaw paghukom! Tungod kay dugay kong gasangyaw sa mga prisohan ug kung mag-inihapay mas daghan ang mga dili Muslim nga nangapriso tungod sa mga dagkong kaso. Kung ato usab nga basihan ang senso mas daghan ang mga dili Muslim nga nagpinatyana tungod sa kahubog ug sa Islam wala kana tungod kay ang pag-inom sa bisan unsang makahubog lig-ong ginadili sa Islam. Mas daghan usab nga mga dili Muslim ang kaso sa abortion, divorce ug mga kadalagahan nga nanamkon nga walay amahan. Sa ato pa ang atong nakita ang hugaw sa atong silingan apan ang sa atong kaugalingon wala nato mabantayan.

PANGUTANA: Nganong daghan man ang terrorista nga Muslim?

TUBAG: Siguro tungod kay sa atong nasud kung mamati ta ug radio ang tag-iya dili Muslim, ug kung motan-aw kita ug telebisyon mao usab pati ang mga tigbalita, sa mga newspaper mao usab. Pero kung ato gayud nga tun-an ang tanan ug kun mag-inihapa ta kung kinsay mas daghan ang napatay mas daghan ug napatay ang mga dili Muslim. Si Sadam Hussein pipila ka libo lang ang iyang napatay apan kung ikumpara siya kang Adolf Hitler mas grabe tungod kay ang iyang napatay pipila lamang ka milyon ug matud sa estimasyon sa mga nagtuon niini niabot ang iyang napatay sa gidaghanon nga 15-25 milyon. Muslim ba si Hitler? Matud pa sa Europol report sa ilang pagtuon niini ginamit ang official FBI records kung asa ang mas daghan nga terorista, sa Muslim o sa dili Muslim ug base sa ilang pagtuon mao kini ang ilang gi-ingon: In my previous article entitled “All Terrorists are Muslims…Except the 94% that Aren’t”, I used official FBI records to show that only 6% of terrorist attacks on U.S. soil from 1980 to 2005 were carried out by Islamic extremists. The remaining 94% were from other groups (42% from Latinos, 24% from extreme left wing groups, 7% from extremist Jews, 5% from communists, and 16% from all other groups). Mahimo ninyong basahon ang official report sa FBI mahitungod sa terorismo sugod niadtong tuig 2000 hangtod karon niining maong website:

PANGUTANA: Nganong kasagaran sa mga Muslim kusog man mobaligya ug mga X-rated movies?

TUBAG: Kini gibawal kaayo sa relihiyong Islam ug kami naguol usab niini kay dako kaayo ni nga problema apan aron masulbad kini nanawagan kami sa tabang sa mga dili Muslim ug ang among panawagan mao kini: “Palihog undangi na ninyo ang pag himo ug mga X-rated nga mga salida aron wala nay ibaligya ang mga Muslim kay unsa pa man ang ibaligya ug wala na diha? Hangtod nga magpadayon kamo sa pag shooting niining maong palabas dili ug dili gayud nato mapugngan ang pagbaligya niana.”

Kinsa man ang mga starring nianang maong mga salida nga gibaligya sa mga Muslim, Muslim ba? Dili! Busa aron masulbad kining maong problemaha kinahanglan nga magkahiusa kita ug magtinabangay.

PANGUTANA: Unsa ka tinuod nga sa Islam pwede man mopatay nga sa Bibliya kini gibawal man? Ang buot ba niining ipasabot nga gitudlo sa Islam nga mopatay ug tawo?

TUBAG: bahin sa unsa ka tinuod nga sa Islam pwede mopatay, ang akong tubag tinuod kana nga sa Islam pwede mopatay apan kinahanglan nga nay bug-at nga hinungdannga giuyonan sa balaud sa Diyos. Kung ibutang ko ikaw sa sitwasyon nga nakita nimo sa imong atubangan nga gilugos ang imong igsoon o kaha inahan mag-ampo ka lang ba sa Dios ug moingon “thou shall not kill”? Kung pananglitan wala ka makakita sa gihimong paglugos apan positibo kasaligang saksi nga mao kanang tawhana ang naglugos sa imong inahan ug igsoon ug mipatay kanila unya nagkaso mo, makaako kaba nga e-rekomenda sa hukmanan nga “ayaw lang sila siloti sa kamatayon kay gibawal kana sa Dios, e-bilanggo lang sa tibuok nilang kinabuhi!” Makaya na nimo nga ang naglugos ug mipatay sa imong inahan ug igsoon ipabilanggo lang nimo ug ikaw pay magpakaon ana kay kanang gigamit sa gobyerno nga ipakaon sa mga pinireso gikan kana sa imong ginabayran nga tax unya gwardiyado pa ang kriminal.

Busa magpaka tinuod ta sa atong kaugalingon. Ang katudluan sa dili Muslim mao kini: “Kung sagpaon ka sa wala ihatag ang too ug kung labayon ka ug bato labaya ug tinapay” samtang ang sa Islam mao kini: “Ayaw yataki ang imong isig-katawo ug ayaw sad pagpayatak, ayaw pagpanlupig apan ayaw pasagdi nga ikaw maoy lupigon, ayaw pagpanaug-daug ug ayaw pagpadaug-daug.” Karon sa imong tan-aw asa sa duha ka mga pagtoo ang imong pili-on?